लन्डन, बैशाख १४ (खेल नेपाल)– पाहुना टोली हडल्सफिल्डमाथि ५–० को फराकिलो जित निकाल्दै उपाधि होडमा रहेको लिभरपुल शुक्रबार राति इङ्लिस प्रिमियर लिग फुटबलको शीर्ष स्थानमा उक्लिएको छ ।
दोस्रो स्थानको साविकको विजेता म्यानचेस्टर सिटी भन्दा एक खेल बढी खेलेको लिभरपुलले दुई अंकको अग्रता बनाउँदै शीर्ष स्थानमा उक्लिएको हो । शीर्ष दुई टोलीको पछिल्ला खेलमा निकालेको जितसँगै उपाधि हो निकै रोमाञ्चक बन्दै गएको छ । लिगमा दुई खेल बाँकी रहँदा लिभरपुलको ९१ अंक भएको छ भने एक कम खेलेको सिटीको ८९ अंक रहेको छ ।
लिभरपुलको घरेलु मैदान एन्फिल्डमा फराकिलो जित निकाल्नका लागि मोहम्मद सालाह र साडियो मानेले समान २/२ गोल गर्दा नावी केइटाले एक गोलको योगदान गरेका थिए ।
खेलको सुरुआतबाट नै आक्रामक देखिएको लिभरपुलले १५ सेकेन्डमा नै अग्रता लिन सफल भएको थियो । नावी केइटाले मोहम्मद सालाहको पासलाई सदुपयोग गर्दै भ्रमणकारी टोली विरुद्ध सुरुआती अग्रता दिलाएका थिए । हावी भएको हडल्र्सफिल्ड विरुद्ध २३ औं मिनेटमा साडियो मानेले गोल गर्दै लिभरपुलको अग्रता २–० को अवस्थामा ल्याए । पहिलो हाफको अन्तिम मिनेटमा सालाहले गोल गर्दै अग्रता ३–० मा पुर्याए । पहिलो हाफमा लिएको ३–० अग्रता लिएको लिभरपुलले दोस्रो हाफमा थप दुई गोल थप्यो ।
६६औं मिनेटमा मानेले पुनः गोल गर्दै अग्रता ४–० मा पुर्याउँदा खेल सकिन ७ मिनेट बाँकी रहँदा सालाहले गोल गर्दै टोलीको फराकिलो जितलाई सुनिश्चित गरे । फराकिलो जित निकाल्न दुई/दुई गोल गरेका सालाह र माने जारी लिगमा सर्वाधिक गोल गर्ने खेलाडी बनेका छन् । २१ गोल पूरा गर्दै सालाह र मानेले म्यानचेस्टर सिटीका सर्जियो एग्युरो र आर्सनलका पाईरि इम्रिकलाई पछि पार्दै गोल्डेन बुटका लागि प्रतिस्पर्धामा छन् ।
लिग सकिन दुई खेल बाँकी रहँदा लिभरपुलले अब न्युक्यासल र उल्भ्ससँग प्रतिस्पर्धा गर्नेछ । उपाधिको होडको अर्को टोली म्यानचेस्टर सिटीले लिगको समापन गर्न वर्नली, लेस्टर सिटी र ब्रिङ्टोनसँग खेल्न बाँकी छ ।