ताप्लेजुङ । तेस्रो संस्करणको पाथीभरा राष्ट्रिय पुरुष भलिबल प्रतियागिताको सेमिफाइनल समीकरण पुरा भएको छ ।
प्रतियोगितामा साविकको विजेता नेपाल पुलिस क्लबसहित, त्रिभुवन आर्मी क्लब, नेपाल एपीएफ क्लब र गण्डकी प्रदेशले सेमिफाइनलमा स्थान बनाएका छन् ।
ताप्लेजुङको साँघुस्थित नारायणी माविको खेल मैदानमा मंगलबार भएको पहिलो क्वाटरफाइनलमा पुलिसले प्रदेश ३ लाई ३–१ को सेटमा पराजित गर्दै अन्तिम चारको यात्रा तय गरेको हो । पुलिसले प्रदेश ३ लाई २५–११, २४–२५, २५–१५ र २५–१४ को सेटमा पराजित गर्यो ।
अब पुलिसले बुधबार हुने पहिलो सेमिफाइनलमा गण्डकी प्रदेशसंग खेल्ने खेल्नेछ । दोस्रो क्वाटरफाइनलमा गण्डकीले टियु विश्वबिद्यालय टिमलाई ३–० को सोझो सेटमा पराजित गर्दै पुलिससंगको भेट पक्का गर्यो । गण्डकीले विश्वबिद्यालय टिमलाई २५–१६, २५–११ र २५–१७ को सेटमा पराजित गर्यो ।
यस्तै आर्मीले प्रदेश २ लाई ३–० को सेटमा पराजित गर्दै अन्तिम चारको यात्रा तय गर्यो । आर्मीले प्रदेश २ लाई २५–१४,२५–१५ र २५–८ को सेटमा हरायो ।
अब आर्मीले फाइनल प्रवेशको लागि बुधबार एपीएफसंग खेल्नेछ । क्वाटरफाइनलमा एपीएफले प्रदेश १ लाई ३–० कै सोझो सेटमा पराजित गर्दै सेमिफाइनलमा स्थान बनायो । एपीएफले प्रदेश १ लाई २५–१५,२५–१४ र २५–२० को सेटमा हरायो ।
जलजले युवा क्लबको आयोजनामा जारी प्रतियोगिताको विजेताले नगद ३ लाख ५१ हजार ५ सय प्राप्त गर्ने छ । यस्तै उपविजेताले १ लाख ७६ हजार २५१ नगद प्राप्त गर्दा सेमिफाइनलमा पराजित दुई टोलीले नगद ५०–५० हजार पाउने आयोजकले जनाएको छ ।
प्रतियोगिताको सर्वोकृष्ट खेलाडीले १५ हजार पाउने छन् । व्यक्तिगत विधामा उत्कृष्ट हुने सर्भर, डिफेन्डर, ब्लकर, क्विकर, स्पाइकर र प्रशिक्षकले समान ७–७ हजार पाउने छन् ।
