भारतको वेस्टइन्डिज टुर अन्तर्गत एन्टीगुवामा जारि पहिलो टेस्टको पहिलो इनिंगमा भारतले ७५ रनको अग्रता लिएको छ। टस हारेर पहिले ब्याटिंग गर्दै भारतले २९७ रन बनाएपछि दोश्रो दिन ब्याटिंग सुरु गरेको वेस्टइन्डिजले तेश्रो दिन पहिलो सत्रमा सबै विकेट गुमाएर २२२ रन मात्र बनाउन सकेको हो।

वेस्टइन्डिजको लागि रोस्टन चेजले सर्वाधिक ४८, कप्तान जेसन होल्डरले ३९, शिमरन हेटमायरले ३५ रन बनाए।

भारतको बलिंगमा इशान्त शर्माले ५ विकेट ( १७-५-४३-५ ) लिए। वेस्टइन्डिजमा इशान्तले ५ विकेट लिएको यो तेश्रो अवसर हो। उनले टेस्टमा ५ विकेट लिएको यो नवौं पटक हो। यस क्रममा इशान्तले ब्राथवेट, चेज, होप, हेटमायर र रोचको विकेट लिए। मोहम्मद शामी र रभिन्द्र जडेजाले समान २/२ विकेट लिए भने जस्प्रित बुम्राहले १ विकेट लिए।

भारतको पहिलो इनिंग 

यस अघि टस हारेर ब्याटिंग गरेको भारतले २९७ रन बनाएको थियो। अजिंके रहानेले सर्वाधिक ८१ रन बनाए भने रभिन्द्र जडेजाले ५८, केएल राहुलले ४४ रन बनाए।

वेस्ट इन्डिजको बलिंगमा केमर रोचले सर्वाधिक ४ विकेट ( २५-६-६६-४ ) तथा शानोन ग्याब्रीयल ( २२-५-७१-३ ) ३ विकेट लिए। यस्तै रोस्टन चेजले २ विकेट ( १६-३-५८-२ ) लिए।

टुर अन्तर्गत भारतले टि-२० सिरिज ३-० ले तथा एकदिवसीयको सिरिज २-० ले जितेको थियो।