आज सिंगापुर प्रस्थान गर्दै नेपाली टिम, यस्तो छ खेल तालिका

जिम्बाबे र सिंगापुरसंग त्रिकोणात्मक सिरिज खेल्न नेपाली राष्ट्रिय क्रिकेट टिम आज सिंगापुर प्रस्थान गर्ने भएको छ। टिमको बेलुका ५ बजे बिदाइ कार्यक्रम रहेको छ।

नेपालले सेप्टेम्बर २७ देखि अक्टोबर ३ सम्म सिंगापुरमा त्रिकोणात्मक सिरिज खेलेपछि त्यतैबाट ओमानमा ५ देश सम्मिलित टि-२० सिरिज खेल्नेछ। ओमानमा नेपालले अक्टोबर ६ देखि १० सम्म सिरिज खेल्नेछ।

दुइ सिरिजको लागि नेपालले १५ सदस्यीय टोलिको गत हफ्ता घोषणा गरिसकेको छ जसमा इशान पाण्डे र कुशल मल्ल जस्ता नयाँ अनुहारले मौका पाएका छन्। शरद भेसावकर, ज्ञानेन्द्र मल्ल, बसन्त रेग्मी जस्ता खेलाडीहरुको स्थानमा टिममा युवा अनुहारहरुले मौका पाएका छन्। ज्ञानेन्द्रले व्यक्तिगत कारणले टिमबाट नाम फिर्ता लिएका थिए।

करेबियन प्रिमियर लिग छोडेर सन्दिप लामिछाने पनि आजै सिंगापुर प्रस्थान गर्नेछन्। सिंगापुर र ओमान टुर हुँदा उनले यो सिजन ६ खेल मात्रै खेल्न पाए।

सिंगापुर र ओमान टुरलाई नेपाली टिमले डिसेम्बरमा नेपालमा आयोजना हुने दक्षिण एसियाली खेलकुदको तयारीको रुपमा लिएको छ। उक्त प्रतियोगितामा २३ वर्ष मुनिको टिम खेल्ने हुँदा युवा खेलाडीहरुको परिक्षणको लागि पनि टुरलाई हेरिएको छ। जुलाईमा सिंगापुरमा आयोजित टि-२० विश्वकप छनौटबाट अघिल्लो चरण पुग्न असफल रहेको नेपाली टिमलाई उक्त असफलता भुलाउने समेत चुनौती रहेको छ।

सिंगापुर र ओमान सिरिजमा मुख्य प्रशिक्षक उमेश पटवाललाई सघाउन अर्का भारतीय प्रशिक्षक भुरिती भेंकटराम पनि टुरमा रहनेछन्। उनले बलिंग बिभाग सम्हाल्नेछन्। भेंकटरामलाई आईसीसीले पठाएको हो।

२०७६ आश्विन ८, बुधबार मा प्रकाशित

Loading...

Leave a Comment