नेपालका युवा लेग स्पिनर सन्दिप लामिछाने इंग्ल्याण्डमा आयोजना हुने ‘द हन्ड्रेड’ क्रिकेट प्रतियोगिताको लागि छानिएका हुन् । प्रतियोगिता इंग्ल्याण्ड र वेल्स क्रिकेट बोर्डको आयोजनामा हुन लागेको हो ।
आइतबार सम्पन्न ड्राफ्ट मार्फत सन्दिपलाई ओभल इन्भिन्सिबल टिमले उनलाई खरिद गरेको हो । उनको मूल्य एक लाख पाउण्ड रहेको थियो । जसको नेपाली मूल्य करिब एक करोड ४७ लाख बराबर हुनेछ । उनलाई टिमले दोश्रो राउण्डको दोश्रो चरणमा छनोट गरेको थियो ।
हरेक टिमले बढीमा ३ जना मात्र बिदेशी खेलाडी राख्न पाउने नियम रहेको छ । उनको टिममा बिदेशी खेलाडीको रुपमा वेस्ट इन्डिजका सुनिल नारिन र वेस्ट इन्डिजकै फेबियन एलेन रहेका छन् । नारिन पहिलो राउण्डको पहिलो चरणमा नै अनुबन्धित भएका थिए भने एलेन पाचौं राउण्डको पहिलो चरणमा छनोट भएका थिए ।
प्रतियोगितामा सन्दिप आबद्द ओभल इन्भिन्सिबल सहित बर्मिङ्घम फोनिक्स, लन्डन स्पिरिट, म्यानचेस्टर ओर्जिनल्स, नर्थन सुपर्चार्जर्स, साउथर्न ब्रेभ, ट्रेन्ट रकेट्स र वेल्श फायर गरि ८ टिमको सहभागिता रहनेछ । विश्व क्रिकेटका समर्थकलाई आकर्षक गर्ने उदेश्यले इंग्ल्याण्ड क्रिकेट बोर्डले १०० बलको क्रिकेट प्रतियोगिता ‘द हन्ड्रेड’ को सुरुवात गर्न लागेको हो ।
टि-२० क्रिकेटको सबैभन्दा अनुभवी जोडीको रुपमा परिचित क्रिस गेल र लासिथ मालिंगा भने कुनैपनि टिममा अटाएनन । दुवैजनाले आधार मूल्य १ लाख २५ हजार पाउण्ड राखेका थिए । यसको मतलब दुवै खेलाडी पहिलो राउण्डमा नै छनोट गर्नुपर्ने थियो । त्यस्तै वेस्ट इन्डिजका कायरन पोलार्ड र ड्वायन ब्राबोसमेत छनोट भएनन् ।