वुमन्स चाम्पियन्स लिग अन्तर्गत लिग चरणको अन्तिम खेलमा पोखरा पल्टनले ललितपुर फ़ाल्कोन्सलाई ६ विकेटले पराजित गरेको छ ।

प्रतियोगिता अन्तर्गत यसअघि भएका ३ खेलमा नै पराजित भएको पोखराले अन्तिम खेलमा सान्त्वना जित निकालेको हो । यस्तै ललितपुर फ़ाल्कोन्सले भने सबै खेलमा पराजित हुँदै प्रतियोगिताको अन्त्य गरेको छ । अर्कोतर्फ चितवन राइनोज सम्पूर्ण खेल जित्दै फाइनलमा प्रवेश गरेको छ भने क्याट क्विन्स काठमान्डौ ३ जित र बिराटनगर टाइटन्स २ जित सहित इलिमिनेटरमा प्रवेश गरेका छन् ।

पोखरालाई जित दिलाउन चौथो विकेटको लागि कबिता कुवंर र बिन्दु रावलले १०६ रनको साझेदारी गरे । कविताले अविजित ६१ रन (४२ बल, १० चौका) तथा बिन्दुले ४० रन (४४ बल, ४ चौका) बनाईन् । पोखराले १७।२ ओभरमा लक्ष्य पुरा गर्यो । यो प्रतियोगिताकै सबैभन्दा ठुलो र पहिलो शतकीय साझेदारी हो ।

यसअघि किर्तिपुर मैदानमा ललितपुरले दिएको १२३ रनको लक्ष्य लिएर उत्रेको पोखराले खराब सुरुवात गरेको थियो । उसले मात्र ५ रनमा सुरुवाती ३ विकेट गुमायो । सिता राना मगर र रेवती धामी १/१ रनमा आउट हुँदा रुबी पोदार डक आउट भईन् । ललितपुरका ममता चौधरी र नेरी थापाले समान २/ २ विकेट लिए ।

टस जितेर पहिले ब्याटिंग गरेको ललितपुरले ७ विकेट गुमाएर १२२ रन बनाएको थियो । उसका ममता चौधरीले अविजित ५२ रन (५१ वल, ७ चौका) बनाईन । त्यस्तै खराब सुरुवात गरेको ललितपुरको लागि कविता जोशीले आक्रामक ३१ रन (२३ बल, ६ चौका) बनाउंदै ममतासंग ५१ रनको साझेदारी गरिन् । सम्झना खड्का १० रनमा अविजित रहिन् । पोखराकी सिता राना मगरले २ विकेट लिईन् ।