बंगलादेशमा शनिवार सम्पन्न एसीसी इमर्जिङ्ग टिम्स एसिया कपको उपाधि पाकिस्तानले जितेको छ। पाकिस्तानले फाइनलमा आयोजक बंगलादेशलाई निराश पार्यो।
बंगलादेशले अफगानिस्तानलाई ७ विकेटले पराजित गर्दै तथा पाकिस्तानले सेमीफाइनल डिफेन्डिंग च्याम्पियन भारतलाई ३ रनले पराजित गर्दै फाइनलमा स्थान बनाएको थियो।
ढाका स्थित शेरे बाङ्ग्ला स्टेडियममा सम्पन्न फाइनलमा टस हारेर पहिले ब्याटिंग गर्दै पाकिस्तानले दिएको ३०२ रनको लक्ष्य पछ्याउने क्रममा बंगलादेशले ४३.३ ओभरमा सम्पूर्ण विकेट गुमाएर २२४ रन मात्र बनाउन सक्यो।
बंगलादेशको लागि अफिफ होसेनले सर्वाधिक ४९, नज्मुल शानटोले ४६ तथा महदि हसनले ४२ रन बनाए पनि जितको लागि पर्याप्त रहेन सकेन। पाकिस्तानको बलिङ्गमा मोहम्मद हसनैनले ३ तथा खुस्दिल शाह र सैफ बदरले २/२ विकेट लिए।
रोहेल नाजिरको शतक
यस अघि पाकिस्तानले ५० ओभरमा ६ विकेट गुमाएर ३०१ रनको योगफल तयार गरेको थियो। उसको लागि तेश्रो नम्बरक ब्याट्सम्यान रोहेल नाजिरले शतक बनाउने क्रममा १११ बलमा ३ छक्का र १२ चौका प्रहार गरेका थिए। यस्तै इमरान रफिकले ६२, साउद शकिलले ४२ रन बनाए। रोहेल र इमरानले तेश्रो विकेटको लागि महत्वपूर्ण ११७ रनको साझेदारी गरेका थिए। बंगलादेशको बलिङ्गमा सुमोन खानले ३ तथा हसन महमुदले २ विकेट लिएका थिए।
प्रतियोगिता आयोजक बंगलादेश सहित, नेपाल, हंगकंग, पाकिस्तान, अफगानिस्तान, भारत, श्रीलंका र ओमान गरि ८ टिम सहभागी रहेका थिए।
समुह ‘बि’ अन्तर्गत रहेको नेपाल समुह चरणमा भारत र बंगलादेशसंग पराजित भए पछि समुह चरणबाट बाहिरिएको थियो। नेपालले हंगकंगलाई ४० रनले पराजित गरेको थियो।