१३ औं दक्षिण एसियाली खेलकुद अन्तर्गत सेमीफाइनलमा स्थान सुरक्षित गरेको नेपाली महिला भलिबल टिमले सेमीफाइनलमा श्रीलंकासंग प्रतिस्पर्धा गर्ने भएको छ।
प्रतियोगिता अन्तर्गत समुह ‘ए’ बाट समुह विजेताको रुपमा भारत र उप-विजेताको रुपमा नेपाल सेमीफाइनल प्रवेश गरेको हो। दुवै खेल हारेको बंगलादेश भने समुह चरणबाट बाहिरियो।
समुह ‘बि’ बाट श्रीलंका र माल्दिभ्स सेमीफाइनल प्रवेश गरेका हुन्। आज सम्पन्न खेलमा श्रीलंकाले माल्दिभ्सलाई ३-० को सेटमा पराजित गरेपछि समुह विजेताको रुपमा सेमीफाइनल प्रवेश गरेको हो। श्रीलंकाले माल्दिभ्सलाई २५-१५, २५-१८, २५-१४ ले हरायो।
अब सेमीफाइनलमा नेपालले श्रीलंकासंग तथा भारतले माल्दिभ्ससंग प्रतिस्पर्धा गर्नेछ। दुवै खेल शनिवार खेलिनेछ। नेपाल र श्रीलंका बीचको खेल ७ बजे राति खेलिनेछ भने भारत र माल्दिभ्सको खेल ५ बजे हुनेछ। तेश्रो स्थानको लागि खेल सोमबार हुनेछ भने फाइनल मंगलबार हुनेछ।
नेपालले साग महिला भलिबलमा हालसम्म रजत र स्वर्ण पदक जित्न सकेको छैन।
साग पुरुष भलिबल अन्तर्गत नेपाल पहिलो चरणबाटै बाहिरीएको छ। नेपालले बंगलादेश र भारत दुवैसंग हार बेहोरेपछि यात्रा समाप्त भएको हो। शुक्रबार जित्ने पर्ने खेलमा नेपाली टिम भारतसंग २५-१५ , २५-१३ र २५-१६ अन्तरले पराजित हुन पुग्यो।