काठमाडौँको विशाल जितमा ज्ञानेन्द्रको विस्फोटक शतक

पोखरा प्रिमियर लिग ( पिपिएल ) टि-२० अन्तर्गत चौथो दिन सम्पन्न पहिलो खेलमा काठमाडौँ गोल्डेन वारियर्सले धनगढी ब्लुजलाई १०६ रनको विशाल अन्तरले पराजित गरेको छ।

यस अघि पहिलो २ खेलमा पोखरा राइनोज र बुटवल ब्लास्टर्ससंग पराजित भएको काठमाडौँको यो पहिलो जित यो। अघिल्लो खेलमा बिराटनगर टाईटन्सलाई पराजित गरेको धनगढीको यो दोश्रो खेल खेल्दा पहिलो हार हो।

पोखरा रंगशाला स्थित क्रिकेट मैदानमा खराब मौसमका कारण करिब १ घण्टा ढिला सुरु भएको खेल १७ ओभरमा छोट्याइएको थियो। टस हारेर ब्याटिंग गरेको काठमाडौँले १७ ओभरमा ५ विकेट गुमाएर १८५ रन बनाउदै १८६ रनको लक्ष्य दिएको थियो।

लक्ष्य पछ्याउने क्रममा धनगढीले १६ ओभरमा सबै विकेट गुमाएर ७९ रन मात्र बनाउन सक्यो। धनगढीको लागि रोड्रीगो थोमसले १० तथा श्रीमंथा विजयरत्नेले १५ रन बनाउनु बाहेक अन्यले दोहोरो अंकमा रन बनाउन सकेनन्।

सन्दिप सुनार खाता नखोली आउट भए भएन कप्तान दिपेन्द्र ऐरी ८, सन्दिप जोरा ७, अमित यादभ ३, सौरभ खानल ९ रन बनाएर आउट भए।

धनगढीलाई सस्तोमा समेट्न काठमाडौँका देब्रे हाते स्पिनर बसन्त रेग्मीले सर्वाधिक ३ विकेट ( ४-१-१७-३ ) तथा सुबोध भाटी र पवन सर्राफले समान २/२ विकेट लिए। अमृत भट्टराई र सुशन भारिले १/१ विकेट लिए।

 

यस अघि काठमाडौँले पहिलो इनिंगमा १७ ओभरमा ५ विकेट गुमाएर १८५ रनको योगफल तयार गरेको थियो।

Gyanendra Malla

काठमाडौँको लागि कप्तान ज्ञानेन्द्र मल्लले प्रतियोगिताकै पहिलो शतक बनाउने क्रममा १०० रन बनाए। उनले मात्र ३८ बलमा ८ चौका र ९ छक्का प्रहार गरे। यस्तै जयकिशन कोल्सावालाले ४६ तथा अमित श्रेष्ठले ३४ रन बनाए।

काठमाडौँका ओपनर गौरभ तोमर खाता नखोली पहिलो ओभरमा कमल सिंह ऐरीबाट आउट भएपछि दोश्रो विकेटको लागि जयकिशन कोल्सावाला र अमित श्रेष्ठले ५० रनको साझेदारी गरेका थिए। अमित सातौँ ओभरमा आउट भएपछि तेश्रो विकेटको लागि कोल्सावाला र ज्ञानेन्द्र मल्ल बीच ९.४ ओभरमा १३१ रनको साझेदारी भएको थियो।

१७ औं ओभरमा कोल्सावाला , मल्ल र सुबोध भाटी गरि कमलले ३ विकेट लिएका थिए।

धनगढीको बलिंगमा कमल सिंह ऐरीले ४ विकेट लिने क्रममा ४ ओभरमा ३७ रन खर्चिए। सागर ढकालले १ विकेट लिए।

खेलको प्लेयर अफ द म्याच ज्ञानेन्द्र मल्ल चुनिए।

२०७६ पुष २, बुधबार मा प्रकाशित

Loading...

Leave a Comment