वेस्टइन्डिजको न्युजिल्यान्ड भ्रमण अन्तर्गत तिन वटा टि-२० अन्तर्राष्ट्रियको सिरिज सुरु भएको छ। इडनपार्क अकल्याण्डमा सम्पन्न पहिलो टि-२० मा घरेलु टिम न्युजिल्यान्ड डीएलएस मेथडमा ५ विकेटले विजयी भएको छ।
खेलमा टस हारेर ब्याटिंग रोजेको वेस्टइन्डिजले पहिलो इनिंगमा निर्धारित १६ ओभरमा ७ विकेट गुमाएर १८० रन बनाएको थियो।
पहिलो इनिंग वर्षाले प्रभावित बनेपछि ओभर २० बाट १६ मा झारिएको थियो। वेस्टइन्डिज १० ओभरमा ९६/५ को अवस्थामा रहंदा वर्षाले खेल रोकिएपछि इनिंग १६ ओभरमा छोट्याइएको थियो। अन्तिम ६ ओभरमा वेस्टइन्डिजले थप ८४ रन बनाउन सफल भएको थियो।
वेस्टइन्डिजको लागि कप्तान काइरन पोलार्डले मात्र ३७ बलमा ८ छक्का र ४ चौका मद्दतले अविजित ७५ रन बनाए। विस्फोटक ब्याटिंग गर्ने क्रममा पोलार्डले इनिंगको अन्तिम ओभरमा ३ छक्का तथा १२ औं ओभरमा ३ छक्का र १ चौका प्रहार गरेका थिए। आन्द्रे फ्लेचरले ३४, फाबीएन एलेनले ३० रन बनाए। शिमरन हेटमायर, रोभम्यानपावेलले खाता खोल्न सकेनन् भने निकोलस पुरनले १ रन बनाए।
न्युजिल्यान्डको बलिंगमा दायाँ हाते पेसर लकी फर्गुसनले सर्वाधिक ५ विकेट लिए जुन क्रममा ४ ओभरमा २१ रन खर्चिए। टि-२० अन्तर्राष्ट्रिय करियरमा उनको यो व्यक्तिगत उत्कृस्ट स्पेल हो। टि-२० अन्तर्राष्ट्रिय क्रिकेट इतिहासमै न्युजिल्यान्ड बलरले एकै इनिंगमा ५ विकेट लिएको यो मात्र दोश्रो अवसर हो। यस अघि टिम साउदीले २०१० मा पाकिस्तान बिरुद्ध १८ रन खर्चेर ५ विकेट लिएका थिए।
न्युजिल्यान्डको इनिंग
दोश्रो इनिंगमा डीएलएस मेथडको आधारमा न्युजिल्यान्डले १६ ओभरमा १७६ रनको लक्ष्य पाएको थियो जुन लक्ष्य उसले १५.२ ओभरमा भेटायो।
लक्ष्य पछ्याउने क्रममा न्युजिल्यान्डले पहिलो ४ विकेट ६३ रनमै गुमाउन पुगेको थियो। त्यसपछि तेश्रो नम्बरमा ब्याटिंग गरेका डेभोन कनवे र जेम्स निशमले पाँचौ विकेटको लागि ७७ रनको साझेदारी गर्दै टिमलाई जिततर्फ डोर्याएका थिए।
First boundary in international cricket for Devon Conway! In early with Tim Seifert. Chasing 177 to win at @edenparknz. Follow LIVE on @sparknzsport | https://t.co/jRVPglfns1 #NZvWI pic.twitter.com/cfmRqcft5m
— BLACKCAPS (@BLACKCAPS) November 27, 2020
१३ औं ओभरमा कनवे आउट भएपछि छैठौ विकेटको लागि निशम र मिचेल स्यान्टनरले अविजित ३९ रनको साझेदारी गर्दै टिमलाई जित दिलाए।
निशमले अविजित ४८ रन बनाए जुन क्रममा २४ बलमा ५ चौका र ३ छक्का प्रहार गरे। डेभोन कनवेले २९ बलमा ४१ तथा स्यान्टनरले १८ बलमा ३१ रन बनाए।
वेस्टइन्डिजको बलिंगमा ओशेन थोमसले २ तथा शेल्डन कटरेल र काइरन पोलार्डले समान १ विकेट लिए।
सिरिज अन्तर्गत दोश्रो टि-२० नोभेम्बर २९ तथा तेश्रो टि-२० नोभेम्बर ३० तारिखमा खेलिनेछ। त्यसपछि डिसेम्बर ३ र डिसेम्बर ११ मा २ वटा टेस्टको सिरिज हुनेछ।
यो पनि पढ्नुस :-
पहिलो एकदिवसीयमा अस्ट्रेलियाद्वारा भारत पराजित, खेलमा के-के बने रेकर्ड