प्रधानमन्त्री कप पुरुष एकदिवसीय राष्ट्रिय प्रतियोगिताको लागि बागमती प्रदेश स्तरीय छनोट प्रतियोगिता अन्तर्गत तेश्रो दिन सम्पन्न दुईवटा खेलमा चितवन र मकवानपुर विजयी भएका छन्।
मुलपानी क्रिकेट मैदानमा सम्पन्न खेलमा चितवनले त्रिभुवन युनिभर्सिटी ( टियु ) लाई पराजित गर्दै दोश्रो जितको साथ समुह ‘बि’ बाट फाइनलमा स्थान पक्का गरेको छ।
टियुले दिएको १४७ रनको लक्ष्य चितवनले ३५.५ ओभरमा ७ विकेट गुमाएर पुरा गर्दै ३ विकेटले खेल जित्यो। चितवनको ब्याटिंगमा रोबिन शर्माले सर्वाधिक २८, विकल कुमार गुप्तले २२, संघर्ष पौडेलले अविजित २० तथा आकाश थापाले १९ रन बनाए।
८३ रनको योगफलमा ५ विकेट गुमाएको चितवनको लागि छैठौं नम्बरमा ब्याटिंग गरेका विकल र सातौँ नम्बरमा ब्याटिंग गरेका संघर्ष पौडेलले छैठौं विकेटको लागि ४४ रनको साझेदारी गर्दै जिततर्फ डोर्याएका थिए।
मकवानपुरको बलिंगमा आयुष बानियाँले २ तथा सुरेश साउद, पृथु बास्कोटा, अर्चना भट्ट र सुशान्त तिमल्सिनाले समान १ विकेट लिए।
टस जितेर ब्याटिंग गरेको टियुले ४० ओभरमा सबै विकेट गुमाएर १४६ रन बनाएको थियो। टियुको लागि पृथु बास्कोटाले सर्वाधिक २८ रन, सुशान्त तिमल्सिनाले २१ तथा अर्चन भट्टले २० रन बनाए। चितवनको बलिंगमा दिपेश श्रेष्ठ, प्रशान्त महत र दिवश आचार्यले समान २ विकेट लिए भने गौतम केसी, संघर्ष पौडेल र दानिश इकबालले समान १ विकेट लिए।
मकवानपुरद्वारा भक्तपुर पराजित
शनिवारनै टियु मैदानमा सम्पन्न खेलमा मकवानपुरले भक्तपुरलाई ६ विकेटले पराजित गर्यो। भक्तपुरले दिएको १३७ रनको लक्ष्य मकवानपुरले ४ विकेट गुमाएर २८ ओभरमा भेटायो।
मकवानपुरको जितमा तक्षक सिंखडाले अविजित अर्धशतक बनाए जुन क्रममा ५६ बलमा १० चौका र १ छक्का मद्दतले ६४ रन बनाए। यस्तै बिशाल फुयाल र सुभ कंसाकारले समान २२ रन बनाए। भक्तपुरको बलिंगमा सुशन श्रेष्ठ र सुबाश खत्रीले समान २ विकेट लिए।
यस अघि टस हारेर ब्याटिंग गरेको भक्तपुरले ३५.२ ओभरमा १३६ रन मात्र बनाउन सकेको थियो। उसको लागि धिरज अधिकारीले सर्वाधिक ३६, प्रशान्त पण्डितले २९ तथा क्रिस कार्कीले १९ रन बनाए। मकवानपुरको बलिंगमा रिजन ढकालले ३ तथा पियुष शर्मा र बिशाल फुयालले समान २ विकेट लिए।
अंकतालिका
