पुष २६ गते देखि काठमाडौँमा सुरु हुने प्रधानमन्त्री कप टि-२० राष्ट्रिय प्रतियोगिताको बागमती प्रदेश छनोट प्रतियोगिताको उपाधि ललितपुरले जितेको छ।

शुक्रबार टियु अन्तर्राष्ट्रिय क्रिकेट मैदानमा आयोजित फाइनलमा ललितपुरले चितवनलाई ७ विकेटले पराजित गर्यो।

चितवनले दिएको ७४ रनको सामान्य लक्ष्य ललितपुरले १४.२ ओभरमा ३ विकेट गुमाएर भेटायो। ललितपुरको ब्याटिंगमा आदील खानले २६, दुर्गेश थापाले अविजित १९ तथा आशुतोष घिरैयाले १७ रन योगदान दिए। चितवनका बलर हेमराज पौडेल, दानिश इकबाल र संघर्ष पौडेलले समान एक विकेट लिए।

यस अघि टस जितेर ब्याटिंग रोजेको चितवनले २० ओभरमा ९ विकेट क्षेतीमा ७३ रन बनाएको थियो। उसको लागि पवन थापाले सर्वाधिक २८ रन योगदान दिए। ललितपुरको बलिंगमा प्लेयर अफ द म्याच चुनिएका हरिओम जोशी एक्लैले ४ विकेट लिए भने तिलक भण्डारी, सुमित झा र बिपिन आचार्यले समान एक विकेट लिए।

प्रतियोगिताको उत्कृस्ट खेलाडी ललितपुरका आदील खान चुनिए भने उत्कृस्ट बलर सुबाश खत्री तथा उत्कृस्ट ब्याट्सम्यान लकी कठाएत चुनिए।