नेपाली क्रिकेट

यी हुन् आईपीएल अक्सनमा दर्ता हुने १५ नेपाली खेलाडी, सबैलाई बोलि नलाग्ने

नेपाल क्रिकेट संघ ( क्यान ) ले इन्डियन प्रिमियर लिग ( आईपीएल ) मा को अक्सनमा दर्ता हुने १५ जना नेपाली खेलाडीको सुची सार्वजनिक गरेको छ।

आईपीएलको मेगा अक्सन ४ वर्ष पछि फेब्रुअरी १२ र १३ तारिखमा भारतको बैंगलोरमा हुँदैछ जसमा विश्वभरबाट १ हजार २ सय १४ खेलाडीले नाम दर्ता गराएका छन्। त्यसमध्ये एसोसिएट राष्ट्रबाट कुल ४१ खेलाडीले नाम दर्ता गराएका हुन्।

अक्सनमा राष्ट्रिय क्रिकेट टिमका कप्तान सन्दिप लामिछाने सहित दिपेन्द्र ऐरी, सोमपाल कामि, करन केसी, कुशल मल्ल, शरद भेसावकर, बिनोद भण्डारी, अविनाश बोहरा, आरिफ शेख, सुशन भारि, रोहित पौडेल, कुशल भुर्तेल, सन्दिप जोरा, पवन सर्राफ र आसिफ शेखले नाम दर्ता गराएका हुन्।

अक्सनमा दर्ता भएका सबै जना खेलाडीलाई अक्सनमा बोलि भने लाग्ने छैन। नाम दर्ता गराएका खेलाडी मध्ये फ़्रेन्चाइजहरुले इच्छा देखाएका खेलाडीहरु तथा छानिएका अन्य खेलाडीहरुलाई मात्र अक्सनमा प्रस्तुत गरिनेछ। सन् २०१८ मा भएको अक्सनमा ५७८ जना खेलाडीले नाम दर्ता गराएकोमा २९२ जना खेलाडीमा मात्र बोलि लागेको थियो। यो पटक पनि यसरी नै निश्चित खेलाडीहरुलाई छनोट गरेर अक्सनमा प्रस्तुत गरिनेछ।

सन्दिप लामिछानेले बाहेक हालसम्म अन्य नेपाली खेलाडी आईपीएल खेल्न छनोट भएका छैनन्। सोमपाल कामिले ग्लोबल टि-२० लिग क्यानडा खेलेका छन् भने पारस खड्का, करन केसी, सोमपाल कामि र कुशल मल्लले युएई टि-१० लिग खेलेका थिए। त्यस बाहेक विश्वका ठूला लिगमा नेपाली खेलाडीले नाम दर्ता गराएता पनि छनोट भने हुने गरेका छैनन्।

आईपीएलमा भारत बाहेक देशका कुल ३१८ जना खेलाडीले अक्सनमा नाम दर्ता गराएका छन्। ओमानबाट ३ जना, अमेरिकाबाट १४ जना, स्कटल्याण्डबाट १ जना, नेदरल्याण्डबाट १ जना, नामिबियाबाट ५ जना तथा भुटानबाट १ जना खेलाडीले नाम दर्ता गराएका छन्। टेस्ट राष्ट्र जिम्बाब्वेबाट मात्र २ जना तथा आयरल्याण्डबाट मात्र ३ जना खेलाडीले नाम दर्ता गराएका छन्। अफगानिस्तानबाट २० जना, अस्ट्रेलियाबाट ५९ जना, बंगलादेशबाट ९ जना, इंग्ल्यान्डबाट ३० जना, न्युजिल्यान्डबाट २९ जना, दक्षिण अफ्रीकाबाट ४८ जना, श्रीलंकाबाट ३६ जना, वेस्टइन्डिजबाट ४१ जना खेलाडीले नाम दर्ता गराएका हुन्।

२०७८ माघ ८, शनिबार मा प्रकाशित