नेपालद्वारा श्रीलंका नेभीलाई सामान्य लक्ष्य, दिपेन्द्रले बनाए सर्वाधिक रन

विश्वकप लिग-२ को तयारीको लागि श्रीलंका भ्रमणमा रहेको नेपाली क्रिकेट टिम पहिलो अभ्यास खेलमा श्रीलंका नेभी स्पोर्ट्स क्लब बिरुद्ध प्रतिस्पर्धा गरिरहेको छ।

खेलमा टस जितेर ब्याटिंग रोजेको नेपालले ३७.१ ओभरमा सम्पूर्ण विकेट गुमाएर २१४ रन बनाउदै श्रीलंका नेभीलाई २१५ रनको लक्ष्य प्रस्तुत गरेको छ।

नेपालको सुरुवात खराब रह्यो। ओपनर कुशल भुर्तेल १३ रन बनाएर आउट भएपछि ज्ञानेन्द्र मल्ल २ तथा रोहित पौडेल १३ रन बनाएर आउट भए। त्यसपछि कुशल भुर्तेल र दिपेन्द्र ऐरीले इनिंग्स सम्हाले। तर नेपालको विकेट जाने क्रम थामिएन।

आसिफ ३६ रन बनाएर आउट भएपछि रोहित पौडेलले १३ रन मात्र बनाउन सके। एक किनार सम्हालीरहेका दिपेन्द्र ऐरी पनि ४३ रन बनाएर आउट भए। त्यसपछि बिनोद भण्डारीले २२, करन केसीले १६, कमल सिंह ऐरीले १५ तथा सन्दिप लामिछानेले ११ रन बनाए। सागर ढकालले १३ तथा बिक्रम सोबले अविजित ११ रन बनाए।

श्रीलंका नेभीका लेग स्पिनर अरभिन्दा अकुरुगोडाले सर्वाधिक ४ विकेट ( ९.१-१-५९-४ ) तथा ए. अवाद्तले ३ विकेट ( १०-१-३१-३ ) लिए।

श्रीलंका नेभी श्रीलंकाको प्रथम श्रेणी क्रिकेट खेल्ने क्लब हो। जारि खेलमा नेपालले अन्तिम एघारमा आरिफ शेख, भिम शार्की, सोमपाल कामि र पवन सर्राफलाई समाबेश गरेको छैन।

नेपालले अन्तिम एघार : सन्दिप लामिछाने ( कप्तान ) , दिपेन्द्र ऐरी, ज्ञानेन्द्र मल्ल, करन केसी, कुशल भुर्तेल, आसिफ शेख, बिनोद भण्डारी, कमल सिंह ऐरी, सागर ढकाल, रोहित पौडेल, बिक्रम सोब

श्रीलंका नेभी अन्तिम एघार : वरुना मायान्था, भाग्या ईडीविरा, केशरा नुवान्था, एम मदुशंका, थिलिना मधुशंका, डी मधुशान, ए फर्नान्डो, अरभिन्दु अकुरुगोडा, पोर्ना चरुका, एस सथिस, ए अवाद्त

नेपालले भोलि मंगलबार पनि श्रीलंका नेभीसंग अभ्यास खेल खेल्नेछ। त्यसपछि मार्च १० तारिख ( बिहिबार ) श्रीलंका पुलिस तथा मार्च ११ तारिख ( शुक्रबार ) मिश्रित श्रीलंकन प्रथम श्रेणी खेलाडीहरुको टिमसंग खेल्ने तालिका छ।

श्रीलंका भ्रमण सकिएपछि नेपाली टिम मार्च १४ तारिखमा युएई प्रस्थान गर्ने तालिका छ।

लिग-२ अन्तर्गत नेपालले युएई र पपुवा न्यु गिनीसंग त्रिकोणात्मक सिरिज खेल्नेछ। सिरिजमा नेपालले युएई र पपुवा न्यु गिनीसंग २/२ वटा खेल खेल्नेछ। नेपालले पहिलो खेल मार्च १६ तारिखमा पपुवा न्यु गिनीसंग, दोश्रो खेल मार्च १८ तारिखमा युएईसंग, तेश्रो खेल मार्च २१ तारिखमा युएईसंग तथा चौंथो खेल मार्च २२ तारिखमा पपुवा न्यु गिनीसंग खेल्ने तालिका छ।

२०७८ फाल्गुन २३, सोमबार मा प्रकाशित