द हिमालयन क्लव अस्ट्रेलियाको आयोजनामा कँडेल कन्सल्टेन्सी क्रिकेट कार्निभल २०२२ को दोस्रो संस्करण अस्ट्रेलियाको मेलबर्नमा सुरु भएको छ।
पहिलो दिन सम्पन्न प्रतियोगिताको चारवटा खेलहरुमा गुल्मी टाइगर्स, एक्स्पर्ट सगरमाथा ब्लुज, फारवेस्ट हन्टर्स र द हिमालयन क्लब विजयी भएका छन्।
दिनको पहिलो खेलमा गुल्मी टाइगर्सले रोयल राइनोजलाई ४ विकेटले पराजित गर्यो। टीडब्ल्यू ब्लेक पार्कमा सम्पन्न खेलमा रोयल राइनोजले दिएको १०१ रनको लक्ष्य गुल्मी टाइगर्सले ६ विकेट क्षेतीमा भेटायो।
गुल्मीको ब्याटिंगमा पदम गौतमले २८ तथा आकाश क्षेत्रीले २० रन तथा बलिंगमा हेमु बुढाथोकीले ४ विकेट तथा आकाश क्षेत्रीले २ विकेट लिए। रोयल राइनोजको ब्याटिंगमा मोहन पुनले १७ तथा निपेश पराजुलीले १७ रन तथा बलिंगमा भिस्म भट्टराईले ३ तथा युत्सभ पोखरेलले २ विकेट लिए। प्लेयर अफ द म्याच अलराउण्ड प्रदर्शन गरेका आकाश क्षेत्री घोषित भए।
दिनको दोश्रो खेलमा एक्स्पर्ट सगरमाथा ब्लुजले एभरेस्ट लायन्स क्रिकेट क्लबलाई ५ विकेटले पराजित गर्यो। एभरेस्ट लायन्सले दिएको ११० रनको लक्ष्य एक्स्पर्ट सगरमाथा ब्लुजले ५ विकेट क्षेतीमा भेटायो।
एक्स्पर्ट सगरमाथा ब्लुजको जितमा ब्याटिंगतर्फ दिनेश सापकोटाले ३२ तथा आशिष जिसीले २० रन तथा बलिंगमा सजेन्द्र श्रेष्ठ र बिक्रम तिवारीले समान २ विकेट लिए। एभरेस्ट लायन्सको ब्याटिंगमा सुमित पराजुलीले ५१ रन तथा बलिंगमा सुरज दाहालले ४ विकेट लिएता पनि जितको लागि पर्याप्त रहेन। प्लेयर अफ द म्याच सुमित पराजुली घोषित भए।
दिनको तेश्रो खेलमा फारवेस्ट हन्टर्सले मभेन क्रिकेट क्लबलाई ९ रनले पराजित गर्यो जुन क्रममा फारवेस्टले दिएको ११९ रनको लक्ष्य पछ्याएको मभेनले निर्धारित १०० बलमा ९ विकेट क्षेतीमा ११० रन मात्र बनाउन सक्यो।
फारवेस्ट हन्टर्सको जितमा ब्याटिंगतर्फ मुसादिया अलिले २९ तथा पुकार घिमिरेले २७ रन योगदान दिए भने बलिंगमा उमर शहिद र संजय खत्रीले समान २ विकेट लिए। मभेन क्रिकेट क्लबको ब्याटिंगमा बिशेष डंगोल र सन्जोग दाहालले समान २४ रन तथा बलिंगमा सन्जोग दाहाल र निरन्जन कार्कीले समान ३ विकेट लिए। प्लेयर अफ द म्याच पुकार घिमिरे घोषित भए।
आजै सम्पन्न चौंथो खेलमा द हिमालयन क्लबले गोर्खाली क्रिकेट क्लबलाई ६ विकेटले पराजित गर्यो। गोर्खालीले दिएको १४६ रनको लक्ष्य हिमालयनले ४ विकेट क्षेतीमा भेटायो।
द हिमालयन क्लबको जितमा ब्याटिंगतर्फ साहिल शर्माले ६३ तथा रमनित सिंहल ४६ रन योगदान दिए भने बलिंगतर्फ सरोज क्षेत्री र केशव पन्तले समान २ विकेट लिए। गोर्खालीको ब्याटिंगतर्फ सुरेश क्षेत्रीले ५३, बिमल केसीले ४२ तथा बलिंगमा उस्मान गिलले २ तथा नितिन क्षेत्रीले १ विकेट लिएता पनि जित्न पर्याप्त रहेन। प्लेयर अफ द म्याच साहिल शर्मा घोषित भए।
अंकतालिका
कार्निभलको दोस्रो दिन अर्थात आइतबार, २० मार्चमा पनि चार खेल हुनेछन्। ओभल एकमा बिहान ९ बजेदेखि द हिमालयन क्लब र रोयल राइनोजबीच प्रतिस्पर्धा हुनेछ भने दिउँसो १२:३० बजेदेखि एक्स्पर्ट सगरमाथा ब्लुज र फारवेस्ट हनटर्सबीच प्रतिस्पर्धा हुनेछ। त्यसैगरी, ओभल तीनमा बिहान ९ बजेदेखि गोर्खाली क्रिकेट क्लब र गुल्मी टाइगर्स तथा दिउँसो १२:३० बजेदेखि माभेन र एभरेष्ट लायन्सबीच प्रतिस्पर्धा हुनेछ।
द हिमालयन क्लब, एक्सपर्ट सागरमाथा ब्लुज, रोयल राइनोस क्रिकेट क्लब, मेभन क्रिकेट क्लब, फार वेश्टर्न हन्टर्स, गोर्खाली क्रिकेट क्लब, एभरेस्ट लायोन्स, गल्मी टाइगर्स गरेर आठ टिमहरुको सहभागीता रहने यो बर्षको द हन्ड्रेड प्रतियोगिता चार दिन शनिबार १९ मार्च, आइतबार २० मार्च, शनिबार २६ मार्च र आइतबार २७ मार्च सम्म चल्ने छ।
प्रतियोगिताको विजेताले तिन हजार डलर र दोश्रो हुनेलाई एक हजार डलर नगद राशीको साथमा कप, पदक र प्रमाणपत्रको व्यबस्था गरिएको छ।
प्रतियोगितालाई क्रिकेट भिक्टोरिया, हार्मनी इन क्रिकेट एसोसिएसन र अन्य नेपाली सामुदायिक क्रिकेट क्लब तथा संघसंस्थाहरुको सहयोग रहेको छ । कार्निभलमा बालबालिकाहरुका लागि टुर्नामेन्टको अन्तिम दिनमा फाइनल खेलभन्दा अगाडी क्रिकेट क्लिनिक रहने आयोजक क्लबले जनाएको छ। र, सहभागी बालबालिकाहरुलाई मेडल समेत प्रदान गरिनेछ।