काठमाडौं । कोपा अमेरिका २०२४ मा उरुग्वेले तेस्रो स्थान हासिल गरेको छ । आइतबार बिहान अमेरिकामा भएको तेस्रो स्थानको भिडन्तमा उरुग्वेले क्यानाडालाई पेनाल्टी सुटआउटमा ४–३ ले हरायो ।

यसअघि निर्धारित ९० मिनेटको खेल २–२ को बराबरीमा सकिएको थियो । कप्तान लुइस स्वारेजले इन्जुरी समयमा गोल गर्दै उरुग्वेलाई पेनाल्टी सुटआउटसम्म पुर्याएका हुन् ।

अब, सोमबार बिहान हुने फाइनल खेलमा उपाधिका लागि अर्जेन्टिना र कोलम्बिया भिड्नेछन् । अर्जेन्टिना कीर्तिमानी १६औं पटक उपाधि जित्ने योजनामा छ ।