काठमाडौं । नेपालले शुक्रबार युएईविरुद्ध खेल्दै नवौं संस्करणको एसीसी महिला एसिया कप २०२४ को सुरुआत गर्दैछ ।
अन्य प्रतियोगितामा नेपाल र युएईको पटक पटक भेट भए पनि एसिया कपमा भने पहिलो पटक आमने सामने हुदैछन् । नेपाल र युएईबीचको खेल शुक्रबार नेपाली समय अनुसार दिउँसो सवा दुईमा सुरु हुनेछ ।
नेपाली महिला टोली तेस्रो पटक एसिया कपमा सहभागी हुदैछ । नेपालले पहिलो पटक २०१२ मा चीनमा भएको एसिया कपमा सहभागीता जनाएको थियो । दोस्रो पटक भने लगत्तै २०१६ मा थाईल्यान्डमा भएको एसिया कपमा सहभागीता जनाएको थियो ।
युएईको भने एसिया कपमा यो दोस्रो सहभागीता हो । २०२२ मा बंगलादेशमा भएको प्रतियोगिताको अघिल्लो संस्करण्मा युएईले सहभागीता जनाएको थियो ।
नेपाल र युएईबीचमा २०२१ पछि दुई प्रतियोगितामा भेट तय भए पनि बर्षाका कारण खेल हुन सकेको छैन । नेपाल र युएईबीचको पछिल्लो पाँच भेटमा दुई खेल वर्षाका कारण राकिदा दुई खेलमा नेपाल तथा एक खेलमा युएई विजयी भएको छ ।
नेपाली महिला क्रिकेट टोलीले हालसम्म ५५ महिला टी२० आई खेल खेलेकोमा ३८ मा जित, १६ मा हार तथा एक खेल नतिजाबिहिन रुपमा सकाएको छ । त्यस्तै युएईले ८३ खेल खेलेकोमा ५० खेलमा जित, ३० खेलमा हार, एक खेल बराबरी र दुई खेल नतिजाबिहिन रुपमा सकाएको छ