काठमाडौं । माल्दिभ्समा भइरहेको काभा यू-२० महिला भलिबल च्याम्पियनसिपमा नेपालले फाइनल प्रवेशका लागि कीर्गिस्तानसँग खेल्ने भएको छ ।

नेपाल र कीर्गिस्तानबीचको सेमिफाइनल खेल सोमबार हुनेछ । शनिबार माल्दिभ्सलाई हराएर तेस्रो स्थानमा रहेको नेपालले दोस्रो स्थानको कीर्गिस्तानसँग खेल्ने भएको हो ।

यसअघि लगातार दुई खेलमा पराजित भएको नेपाल माल्दिभ्सलाई हराएपछि चार टोली सहभागि च्याम्पियनसिपमा २ अंकसहित तेस्रो भएको हो । सबै तीन खेल हारेको माल्दिभ्स अंकविहिन बन्यो।

पहिलो खेलमा नेपाल श्रीलंकासँग ३–१ सेटमा पराजित भएको थियो भने दोस्रो खेलमा कीर्गिस्तानसँग ३–० को सेटमा पराजित भएको थियो।