काठमाडौं । नेपालले आज(आइतबार) साफ यु–२० च्याम्पियनसिपको फाइनल प्रवेश गर्न भुटानसँग प्रतिस्पर्धा गर्दैछन्। सातदोबाटोस्थित एन्फा कम्प्लेक्समा हुने खेल अपरान्ह ३ बजे सुरु हुनेछ।

नेपाल समूह ‘ए’ को विजेता बन्दै सेमिफाइनल पुगेको हो । भुटान भने समूह बी को उपविजेता बन्दै सेमिफाइनल पुगेको हो । नेपालले समूह चरणका दुवै खेल जितेको थियो । समूह चरणमा नेपालले श्रीलंकालाई १–० र बंगलादेशलाई २–१ ले पराजित गर्दै ६ अंक जोड्यो। भुटानले समूह चरणमा माल्दिभ्सलाई पराजित गर्दा भारतसँग भने पराजित भएको थियो ।

बंगलादेश नेपाल रहेको समूहको उपविजेता बन्दै सेमिफाइनल पुगेको छ । नेपाल रहेको समूहको अर्को टोली श्रीलंका भने अंकविहीन हुँदै घर फर्किसकेको छ।

साबिक विजेता भारतले अब सेमिफाइनलमा साबिक उपविजेता बंगलादेशसँग सोमबार प्रतिस्पर्धा गर्नेछ। अघिल्लो संस्करणमा बंगलादेशलाई पराजित गर्दै भारतले उपाधि जितेको थियो।