एभरेष्ट महिला भलिबल लिग (इडब्लुभिएल) का लागि चितवन शक्तिको ट्यालेन्ट हन्टबाट नितिशा महतो छनोट भएकी छन् ।
भरतपुर २२ को कभर्ड हलमा आज सम्पन्न ट्यालेन्ट हन्टबाट नितिशा चितवन शक्तिका लागि छनोट भएकी हुन् ।
ट्यालेन्ट हन्टमा चितवनका ३४ भलिबल खेलाडी सहभागी थिए । प्रशिक्षक अर्जुन घिमिरे र कप्तान अरुणा शाहीले उनीहरु मध्य नितिशालाई छनोट गरेका हुन् । यो सँगै नितिशाले चितवन शक्तिबाट एभरेष्ट महिला भलिबल लिग खेल्ने भएकी हुन् ।
छनोट भएपछि नितिशाले खुशी व्यक्त गर्दै भलिबल करियरको नयाँ यात्रा सुरु भएको बताइन् । भरतपुर २७ की नितिशा हाल स्थानीय जानकी माविमा कक्षा १२ मा अध्ययनरत छिन् । ५.८ उचाई भएकी नितिशा आउट साइड हिटर हुन् ।
जानकी माविबाट यसअघि खेलेका आरती सुवेदी र संगम महतोले राष्ट्रिय टोलीमा छन् । ६ टोलीको सहभागितामा इडब्लुभिएलमा असोज १४ देखि असोज १९ गते हुनेछ।