काठमाडौं । जाउलाखेल युथ क्लब र संकटा क्लले शहिद स्मारक ‘ए’ डिभिजन लिगमा बराबरी खेल्दै अंक बाँडेका छन् । दशरथ रंगशालामा बिहिबार भएको खेलमा जाउलाखेल र संकटाले १–१ गोलको बराबरी खेल्दै अंक बाँडेका हुन् । संकटाले सुरुवाती अग्रता लिए पनि जोगाउन सकेन । संकटाका लागि लक्ष्मण रुचालले गोल गरे ।
३६ औं मिनेटमा रुचालले फ्रिकिकमार्फत उत्कृष्ट गोल गरेका थिए । रुचालको लामो प्रहार सोझै गोल भएको थियो । दोस्रो हाफमा खेलमा फर्किएको जाउलाखेलले ७२ औं मिनेटमा बराबरी गोल गरेको थियो । जाउलाखेलका ड्याडी जुनियर बाम्बाले हेड गोल गरे । उनले हरि कठायतको लामो फ्रिकक पासमा गोल गरेका थिए ।