- काठमाडौं, मंसिर १८
गौरिका सिंहले २ सय मिटर फ्रि–स्टाइल विधामा बिहीबार नेपाललाई स्वर्ण पदक दिलाएकी छिन् ।
सातदोबाटोको हिटिङ स्विमिङ पुलमा गौरिकाले २ मिनेट ५.०६ सेकेन्ड समयमा पूरा गर्दै स्वर्ण पदक जितेकी हुन् । २ सय मिटरमा भारतकी सिभांगी शर्माले रजत पदक हात पार्दा बंगलादेशी जुनायन अहम्मेदले कास्य पदक जितिन् ।
गौरिकाले नयाँ राष्ट्रिय कीर्तिमानसहित स्वर्ण जितेकी हुन्न्। यो सागमा नेपालको लागि पौडीमा व्यक्तिगत पहिलो स्वर्ण हो । यसअघि १९९९ मा नेपालमै भएको आठौं सागमा नेपालले टिम इभेन्टमा स्वर्ण जिते पनि व्यक्तिगततर्फ जित्न सकेको थिएन। गौरिकाले भारतमा सन् २०१६ मा भएको १२औं सागमा नेपाललाई व्यक्तिगत इभेन्टमा पहिलो रजत दिलाएकी थिइन् ।
यस्तै २ सय मिटर महिला ब्रेसस्टोक नेपालकी दुवाना लामाले नेपालका लागि रजत पदक हात पार्दा भारतकी अपेक्षा दिलेला स्वर्ण र श्रीलंकाकी रामुदी नुलाराले कास्य पदक हात पारिन्।
बिहीबारै पुरुष २ सय मिटर फ्रि–स्टाइलमा श्रीलंकाका म्याथु डुनकानले स्वर्ण पदक जिते । सोही स्पर्धामा भारतका कुशाग्रा रावतले रजत पदक हात पार्दा भारतकै आनन्दा अनिल कुमारले कास्य पदक जिते । उता २ सय मिटर पुरुष ब्रेस्टोकमा भारतले स्वर्ण र कास्य पदक हात पार्दा श्रीलंकाका किरन मलिकले कास्य पदक जिते । भारतका लिकथले स्वर्ण र धनुस सुरेशले रजत पदक जितेका हुन्।
यस्तै एक सय मिटर पुरुष बटरफ्लाईमा श्रीलंकाका म्याथ्यु डुनकानले स्वर्ण पदक आफ्नो नाममा लेखाउँदा भारतका मिहिर राजेन्द्र अम्ब्रेले रजत र बंगलादेशका महम्मद माहामुदिन नोबीले कास्य पदक जिते । १ सय मिटर महिला बटरफ्लाईमा भारतकी दिब्या सातिजा पहिलो बन्दै भारतलाई स्वर्ण पदक दिलाउँदा भारतकै अपेक्षा देयालाले कास्य र श्रीलंकाकी अनिकह गाफुरले कास्य पदक जितिन् ।
बिहीबारै पुरुष ४ सय मिटर पुरुष रिलेमा श्रीलंकाले स्वर्ण पदक जित्न सफल भयो । सोही स्पर्धामा भारतले रजत र बंगलादेशले कास्य पदक हात पार्यो । महिला तर्फ भने भारतले बाजी मार्न सफल भयो । श्रीलंकाले रजत पदक हात पार्दा नेपालले कास्य पदकमा चित्त बुझायो ।
बिहीबार ८ स्वर्ण पदकका प्रतिस्पर्धा भएको थियो । जसमा नेपालले १ स्वर्ण, १ रजत र १ कास्य पदक हात पार्दा भारतले ४ र श्रीलंकाले ३ स्वर्ण पदक जिते ।